Archivo Digital
| Derechos de la Mujer Lengua: Cha'palaa Nacionalidad: Chachi 1.- ECUADORCHI KAYU BALE JUMU KIIKA ENTSANGEMISHTINU JUVE * Ecuadorchi kayu bale jumu kiikanuren tsandive, naa unbeerukula, supula bain taawasha ke’ jindaa lala’ tunu aawa’ lawaandetsuve, tive. * Supulanu unbeerukulanu bain naa naake kuņaa ura’ tyanu deeņuba tsatsangenu dejaa tive. 2. ECUADOR ENTSANGENBERA KENU JUVE * Chachilla titi kenu deechu detaņuba, uwain tsaangikaanu juve. Tsenmin supula, unbeerukula bain titi kin chutaa ura’ tyanu deeņuba tsangikaanu juve. 3. CHACHILLA MAIN MAIN ENTSAGENU DEECHU DETAVE * Muchiba tutanjutyu. * Muchiba tituba injutyu : Veelachi mafirui’ jaiba llakinbasa injutyu ; chachillanuya tsangityuwa deenun tsa-i’ mayujpeya-i’ puitanjutyu. Naa ne katyai’, ne tituba inu i’ wapandanu bain jutyu. Supulaya tsaindyaindetyuya deranchi tsangenu uuden jutyuve. * Kaillanu, supulanu bain, naa shinbulanu, rukulanu bain firu’ ke’ tituba kimu deeņu’ mitya. * Ecuadornu chumu balela naakitaa entsa paate tsangikaanjutyu’ bain tsatsange kemishtinu dejuve. Tsenmin naa uwanuba juntsa mas matsangikaanjutyu detire’ naa tsangimulanu bain asteeba deke’puinu bain kenu dejuve. * Kavitu kinu ajuushaa kumuinchi chachilla paree judeeyu. 4. NUKA CHUMU CHACHILLABA ENTSA DEECHU DETAVE * Ecuadorchi kayu bale jumu kiika naatiņuba tsanginu dejuve. Kayu kavitu kinu pilla jutyaa titaa tsangityu’ puinu dejutyuve. Ne vera’ ke’ puinu bain dejutyuve. 5. UNBEE MIYALA’ DEECHU * Unbee miyala, naa supu miyala bain na deka’ chutu yaichi tie uraanuu juņuba juntsa mi’ken dechushu juntsaa tsangiņu uraa pensange’ kumuinchi tsangimishtinu juve. * Ya’ amala, kasaa jula bain naa jutyula bain tiba injutyu Ecuadorchi kayu bale jumu kiikachi washanu dejuve. Mu’ kailla deju’ba, balelachi tsai keengayamula bain, naa tsajutyula bain tsaren washanu detsuve. * Ti meneste dejuņuba kumuinchi na-amalanu tsangive’nu juve. * Na, nan miyandinu detya’ba, uwain tsangenu tyashu juntsaa na tsantsa kakaakinu dejuve. Tsangityumee veena ka’ miyanna tiwaakenu ju’ bain, naaketaa kaillanu washkenu ju’ bain, naakitaa kiika mijakaanu ju’ bain tsangenu dejuve, matyu balela tsangenu deechu detaa detyaņu’ mitya. * Ya’ paandelan Ecuadorchi kayu bale jumu kiikachi washan dejutyuve, naa veela, kaillanu washkemula bain tsaren inu detsuve. 6. KIIKA MIJANU PAATE * Supu na’malanu, unbee nalanu bain parejuren buute’ kiika mijakaanu kenu juve. * Akawadu kiika demijansha vinu detyanmalaa naa supulanu unbeelanu bain parejun eepunu kinu juve. * Kiika mijanu paatetala panmalaa na amala ya’ rukuba kivete kivete kinu dejuve. * Kailla kiika pumulanuya, naa ajke’ vimulanu bain naa yumaa vimulanu bain Ecuadornu chumu chachilla ti deechu detaņu bain mijakaakaa kinu dejuve. 7. KUINDA MIJAKARA * Firu’ kikaakinuu kuinda bain, supulanu cha’tene juu keewaraa paate bain kenjutyu. Chachiitala faatanguraa kuinda bain, naa Dyusnu keenginu paate juu kuinda bain kenjutyu, tsanditu chachillanu yujpewaakinaaba jukeeshu juntsaa. 8. DILUJTU CHUNU PAATE * Dilu’ tu’pukutinu jijiinu ya, uņichi paajuu bain, naa uņichi paajutyula bain pure’ diluu dejanmalaa naake’ba keenakaandejutyuve. * Naa itaa diluu chunjutyuņu bain, juntsa paate uņi mijakaren chunu juve. Titi fin chutaa ura’ panda fa chunu deeņu bain, manen namiyala naa kailla bain titi fin chutaa diluu chun dejutyuņu bain entsa paate uņi kayu den keedinu juve. Tsenmin naaken chutaa supula ya’ rukulaba den tsatsaindu’ba diikaavin jutyu dejuņuba juntsa paate bain mijakarenu juve. 9. TAAWASHA PAATE * Lushi laakinuu taawashatala , supulanu bain tsaren taawasha kinu eepunu tsuve. Tsenmin unbeerukulanu naake lushi paange’ba supulanu bain tsaren paangikaanu juve. * Taawasha kimula, nan malu kimu deeņu bain, kepenge kimu deeņu bain, ti’mitya ti’mitya lushi kamu deeņu bain juntsan kekaanu juve. Tsenmin supula taawasha kendetsushu juntsaa maratu mangepunu pudej detuve. Seguridad Socialsha bain de-eepunu juve. Napuu nenu uranu bain, na ka’ chuchu kunu uranu bain kayu den washkinu juve. * Supulaa entsa taawasha kenu pudejdetaa ti’ kikaanjutyuya kinu dejutyuve. * Supula lushi kai’mujchi yasha taawasha kiken detsushu juntsa bain, lushi paa-imu taawasha juuņunge detireve. 10. TI TAAWASHANUBA SUPULA BAIN VINU PUDE DEEVE * Unbeerukula nutala bale vinu detya’ tsange faawaanu kindetsushu juntsaa naa supula bain tsa i’ bale kalaranu pude deeve, naa tinu taawasha kikinuu juņuba. * Tsenmin maratu’ mitya yaichi entsaa uuden bain faave : Supula bain 25% juuņui devi’ unbeerukulaba bale tiya’ chunu dejuve. 11. TIBA TADEEWASHU JUNTSA PAATE * Supulanu unbeerukulanu bain tsaren taawasha kekare’ atikenuu faawaakaanu juve. Tsenmin lushi laashu juntsaa, tinu tinu kastangenu ju’ba yaitene tsandi depa’ tsatsange kenu dejuve. Naa ti kake’ bain tsaren duveņi deeve. 12. KAYU TE’ DILUINUULA * Entsalaya, kailla bain, pannangayila, unnangayila, naa rukula shinbula bain dejuve. Naa napulabain, naa ura chachi jutyula bain entsalaba debuunave. Yalaa uņichi kayu ura’ washanu dejuve. Yalaa titi te’ meneste deeņuba kayu te’ kuwanu dejuve. Tsenmin naa supula katyadeishu juntsala bain , naa kailla tsamantsai aste imula bain tsaren washanu dejuve.
Intérpretes: |
